Nagatalingison ang iloy sang isa ka tuig nga bata nga napatay sa nagluntad nga sunog sa Purok Active, Barangay Mandalagan, Bacolod City sang Sabado sang gab-i.
Sa interview sang Bombo Radyo Bacolod kay Estella Cabuguas, masakit para sa ila ang natabo kag daw indi pa nila mabaton.
Suno kay Cabuguas, ang anum ka tuig nga bata ang nagapabilin sa ospital matapos nga mapaso ang iya abaga, portion sang guya kag mga kamot sini apang sa karun estable naman ang kondisyon.
Suno sa iloy, wala ini makahibalo nga wala gindala sang iya kamagulangan ang mga manghod sini sang nagpauli sa Celines Homes sa Fortune Town sa balay sang iya bana.
Suno diri ang isa katuig nga bata kag anum katuig ang ginbilin sini sa iya 20 anyos nga bata.
Ginadala man sang 20 anyos ang duha sa pagpauli sini apang sang Sabado wala sang ideya ang iloy nga nagpauli ang magulang sa Celine Homes nga wala nadala ang manghod.
Ang nabilin nalang sa balay nga nasunog ang 17 anyos, anum ka tuig kag ang napatay nga isa katuig nga bata.
Ang tatlo ang nagkadto sa baylehan agud nga maglantaw bangud kay fiesta apang sila ang nagpauli matapos magmaoy ang isa ka tuig nga bata.
Ginsindihan sang magulang ang kandila kag gintungtong sa plastic nga Durabox kag nagbalik sa baylehan agud nga maglantaw.
Suno kay Cabuguas mahimo nga naupod na ang kandila kag naglatay ang kalayo sa mga bayo nga nasulod man sa plastic gani nagluntad ang sunog.
Una nga ginpahayag sang katupad balay sang mga biktima, nga nakita sini sa ila pader nga may buho ang anum ka tuig nga bata nga iya gilayon ginbutong.
Suno sa kaingod nila, wala man nagapangayo sang bulig ang anum ka tuig nga bata kag kaangay nga nagaka-urongan lang kag sang ginkuha na halin sa ila balay, amo na naghibi ini kag naghambal nga yara pa sa sulod ang iya manghod.
Gintinguhaan pa salbaron ang isa ka tuig nga bata apang nagdako na gid ang kalayo.
Ang bangkay sang bata ang ihaya sa Purok Active ihaya kag estoryahan pa sini kag sang iya kalive-in kun sa diin ini ilubong.
