Ginkumpirmar sang iloy sang 34 anyos nga lalaki nga naglumpat sa Ayala Malls Capitol Central nga nagasuprer sang depression ang ila bata.
Sa interview sang Bombo Radyo Bacolod kay Alias Bebing, 65 anyos, iloy sang biktima nga ginkilala lamang kay Alias John, 34 ayos, Information Technology graduate, nag-umpisa ang depression sang ila bata sang nagpadulong sa Estados Unidos ang iya tiyo nga tuman sini ka-close sadtong 2015.
Paghalin sang tiyo, si John ang masami nga ginabully kag ginahampak sang bato.
Ini ang wala naman nagtrabaho kag nagapabukot lamang sa ila nga balay, tubtob nga siya ang ginparehab na nila sang 2023.
Liwat nila ini nga ginrehab sang maglala ang depression sang nakaligad nga Hulyo.
Suno kay Bebing, may tion naman nga nadula si John sang duha tubtob tatlo ka adlaw apang ini nagapauli man.
Kahapon alas-11:00 sang aga, naglisensya si John nga may laglagaw kag ini ang ginpabalunan man sang iloy.
Suno kay Bebing, nagtext pa si John alas-6:00 sang hapon nga siya ang yara sa Provincial Capitol lagoon.
Kasunod sini, siya ang nagcontact man sa iya magulang agud magpangayo sang kwarta bangod siya ang magapanyapon sa Ayala kag ini ang ginpadal-an man sang magulang.
Bangod gab-i na, ginpangita na nila si John tubtob sa ila isa pa ka balay sa Doña Juliana Subdivision sa Barangay Mansilingan, apang wala didto ang biktima tubtob nga ini ang natawagan sang iloy apang kaangay nga may ginadalian.
Kasunod sini, nakita na lamang sang iya magulang ang facebook post sang Bombo Radyo Bacolod nga may naglumpat sa Ayala Malls kag kaangay sang panapton nga itom nga bayo, itom nga shorts kag itom nga sapatos.
Gilayon man nga ginpadulungan ni Bebing upod sa iya bana nga masobra 80 anyos na ang mall kag nakumpirmar nga si John ang naglumpat.
Suno sa iloy, wala na ini nag-upod sa pagkumpirmar bangod nangluya na ang iya nga tuhod gani siya ang nagpungko na lamang sa higad kag siya ang gin-alalayan na lamang sang gwardiya.
Apisar nga nagakalisod, batun na sang pamilya ang nangin natabo sa ila bata.
