Nagapanindugan ang iloy sang lalaki nga napatay sa gina-alegar nga engkwentro sa tunga sang 79th Infantry Battalion sang Philippine Army batok sa gina-alegar New People’s Army kahapon kapin alas 4:00 sang hapon, nga sibilyan ang iya bata kag omagad apang sila ang ginpatay sang Philippine Army.
Suno sa iloy nga si Jocelyn Vargas iya gin-ako nga aktibo nga miyembro sang NPA ang iya bana apang madugay na ini nga wala nakapakita sa ila.
Iya man gin-ako nga napatay sa engkwentro ang isa man sini ka bata.
Apang, indi sini mabaton nga ginpatay ang iya bata kag ang omagad nga nagapangabuhi sang insakto kag matarong.
Ang bata sini nga lalaki amo si Christian Vargas kag ang asawa sini amo si Mylene Salgado.
Si Christian isa ka mangunguma samtang si Mylene naman nagabaligya sang pagkaon sa buluthuan.
Sila may duha ka kabataan, lima ka tuig nga bata nga babayi kag isa ka tuig nga bata nga lalaki.
Suno kay Jocelyn, nagapas-an sang saging si Christian sang hinali nga nagsugod ang militar kag nagpaarak sang tiro.
Suno kay Jocelyn, wala sang natabo nga engkwentro bangod gilayon lang nga nagpaarak sang tiro ang mga militar kag sang napatay na ang mag-asawa ila lang ini ginbutangan sang mga armas-luthang.
Nagasinggitan ini nga kuntani magbag-o na ang militar kag indi maghimo-himo sang esturya.
Dugang pa sini, kun tani gindakop lang sila ukon ginpilasan lang basta sila buhi lang bangod nga wala man sala ang iya bata kag omagad.
Samtang sa bahin naman sang Philippine Army, narekober sa mag-asawa ang anum ka high powered firearms.
Nagresponde ang 79th Infantry Battalion sang Philippine Army sa report nga may yara sang grupo sang Northern Negros Front, Komiteng Rehiyon – Negros, Cebu, Bohol, Siquijor sa area.
Naglawig sa 15 minutos ang engkwnetro kun sa diin duha ang patay sa bahin sang NPA kag wala naman sang kaswalidad sa bahin sang Philippine Army.
Narekober sa mag-asawa ang duha ka M16 rifles, M14 rifles, kag mga bandoliers, AR15 rifle, Garand rifle, apat ka rifle grenade, mga bala, mga personal nga gamit kag mga dokyumento.
