Tuman ang kasubo sang iloy sang lalaki nga ginsalvage kag nasapwan sa Bangga Yap, Barangay Alangilan, Bacolod City kahapon sa natabo sa iya anak.
Ginkilala ang biktima kay Christian Bawang, 27-anyos kag residente sang Purok Villamar, Brgy. Estefania, Bacolod City.
Sa interview sang Bombo Radyo Bacolod kay Jelyn Bawang, masami man nga nagalakat ang iya anak apang nagapauli gid sa gab-i apang sang nagligad nga adlaw wala ini nakapauli.
Suno sa iloy sang Domingo ginhambalan sini ang iya bata nga magpauli gid bangud nagkadto ini sa balay sang iya abyan sa Purok Pag-asa sa nasambit nga Barangay bangud may ubrahon ini didto.
Suno diri, ginpahayag sang nakakita kay Christian nga ulihi nakita ang biktima sang pareho nga gab-i nga nagsakay sa pribado nga salakyan nga nagaduag gray, kun sa diin kaangay nga kilala niya ang sakay diri.
Hugot man nga ginpanginwala sang iloy nga imbulbado sa transaksyon sang illegal nga druga ang iya anak.
Dugang pa sini ang amay ni Christian nga si Winston nga nagatrabaho sa construction ang nagagamit sang illegal nga druga.
Suno diri inum kag panigarilyo lamang ang bisyo sang iya anak.
Suno kay Jelyn, ang bag ni Christian nga dala sini sang nagsakay sa van nga may unod laptop, cellphone kag ang wallet sini ang wala narecover.
Suno diri may yara pa sang kwarta sa electronic wallet sini nga kapin P40,000 nga ginpadala sang iya pakaisa nagikan sa luwas sang pungsod agud nga idown payment sa duha ka cellphone.
Si Christian ang maayo nga bata kag ini ang nagabulig sa ila balay agud nga magbakal sang bugas kag sud-an.
Ginpahayag man sang iloy nga sang-una si Christian ang nagatrabaho sa Call Center apang nagresign kag nagtrabaho man bilang campaign manager sang isa ka politiko sa ciudad sang Bacolod.
