Iloy sang napatay sa pagpangluthang sa Barangay Banago, nagapati nga nasal-an lamang ang iya bata

Nagtalangison ang iloy sang 27 anyos nga lalaki nga gintiro sa Purok Langis, Barangay Banago sa ciudad sang Bacolod, kahapon sang hapon, September 27.

Sa interview sang Bombo Radyo Bacolod sa iloy sang biktima, nagapanindugan ini nga nasal-an lamang ang iya nga anak kag indi man sini mabaton ang natabo diri.

Ginpahayag man sini nga may ka live-in ang biktima apang wala ang mga ini sang bata.

Suno sa iloy wala sang kontra ang iya nga anak bangud kun may ara siya ang una nga makahibalo.

Nagapanawagan man ini sang bulig nga mahatagan sang hustisya ang natabo sa anak sini.