Nagatalangison ang iloy sang security guard nga gintiro-patay sa Purok Zone 1, Barangay Handumanan, ciudad sang Bacolod samtang nagapanawagan sa ka live-in sang biktima nga ihatag sa ila ang original copy sang death certificate agud mapalubong ini.
Kagab-i nagsaka sa estasyon sang Bombo Radyo Bacolod ang pamilya sang biktima nga si Arnold Caballes, 37 anyos, tumandok sa ciudad sang Kabankalan apang siyam ka tuig na nga nagapuyo sa Purok Ilaya, Barangay Cabug, Bacolod City upod sa iya live-in partner kag kabataan.
Nagdangop si Bernadeth Caballes sa “Ipa Bombo Ta” bangud indi na nila macontact ang kalive in sang ila anak nga si Dholly Malalu-an.
Nagpadulong man ang mga ini sa Barangay apang wala na didto sa Barangay Cabug si Malalu-an bangud nagsaylo ini sa Purok Arao, Barangay Vista Alegre, Bacolod City kun sa diin ang pamilya sini bangud sa kahadlok nga balikan sang suspek nga nagpatay sa biktima.
Macontact man nila ini apang ang bata nalang ni Malalu-an ang nagasabat sang tawag.
Indi man maghatag ang City Health sang kopya sang death certificate bangud nagakahangawa nga madouble entry na.
Suno sa iloy dapat mahatag na ang original copy sang death certificate agud nga malubong na ang bangkay sang biktima.
Gin-athag naman sang isa ka abugado sa ciudad sang Bacolod nga mahimo lamang makarequest sang original copy sang death certificate sang biktima sa local civil registrar sa ciudad sang Bacolod bangud diri napatay ang biktima.
Sa interview sang Bombo Radyo Bacolod kay Atty Jomax Ortiz, mahimo makarequest sang kopya kag indi man ini double-entry bangud pareho lamang nga persona ang pangayuan sang death certificate.
Suno diri mahimo lang magrequest sa local registrar sang Bacolod.
Nagpasalig man ini nga kun indi mahatagan ang nagarequest nga pamilya siya mismo personal ang magarequest bilang isa ka abugado kaupod ang Bombo Radyo Bacolod agud nga malubong na ang biktima.
Samtang, gin-athag man sini nga santo sa layi ang iloy kag pamilya sa gihapon ang may deber sa pagpalubong sa biktima bangud indi ini kasado sa iya kalive-in.
