Iloy sang suspetsado nga nagluthang sa iya ex-girlfriend kag bag-o sini nga nobyo sa Guimaras State University, aminado nga gintuyo nila nga punggan ang suspect apang napaslawan

Wala gid napunggan sang mga ginikanan sa Barangay Zone 6, Pulupandan, Negros Occidental ang ila nga bata nga lalaki nagpadulong sa Guimaras State University (GSU) nga nagluthang-patay sa iya anay kahagugma kag sa bag-o sini nga nobyo.

Ang mga biktima ang ginkilala nga sanday Christine Mae Piamonte, 22 anyos, 4^th year student sa kurso nga Bachelor of Science in Business Administration, nga ginbaiwan sang kabuhi, kag ang karun nga nobyo sini nga si Ram Arlo Tacubay, 26 anyos, musical director sa nasambitan nga unibersidad para sa Palayag Festival, nga yara karun sa kritikal nga kondisyon.

Ang suspetsado ang ginkilala nga si Zoilo Sereño, 22 anyos casual employee sa Pulupandan Rural Health Unit.

Sa exclusive interview sang Bombo Radyo Bacolod sa iloy sang biktima, nakaagi naman nga nagbulagay sadto si Sereño kag Piamonte kun sa diin nagtuyo nga manginmatay ang suspetsado pinaagi sa pagbunggo sang iya motorsiklo.

Sa amo nga tion, nag-ako si Piamonte sa mga ginikanan sang biktima nga luyag na sini nga magbulag bangod sa batasan sang ila bata kag sa makitid sini nga panghunahuna.

Apang pahayag ni Mrs Sereño, nga nagpadayun lamang gihapon ang ila nga pagchat gani nagpinsar man ini nga nag-ayuhay na sila.

Sang damlag lamang, liwat naman nga nagpabutyag sang kaakig ang ila anak kag nagapanindugan nga ang tanan ang kabutigan lang.

Ginhambalan man ini sang iya mga ginikanan nga magmove on na bangod mas maayo na lamang nga naga-ako ang babayi nga indi na sa iya.

Apang suno sa mga ini, si Zoilo ang wala nagapamati sa ila kag kun ano ang iya luyag amo ang ginabuhat sini.

Sa Guimaras man nagdako si Zoilo kag nakabalik lamang sa ila sang high school, apang wala man sini gintapos kag nagbalik sa Guimaras sa iya lolo kag katiyaan.

Kahapon nakahibalo na ini nga magatabok sa isla ang iya bata kag ila man ini nga ginpunggan kag ginpaandaman nga indi pag dayunon ang kun ano man nga ginaplano.

Ginpahangop nila nga wala sang ginikanan nga luyag mapriso ang ila bata bangod mas luyag nila nga ini ang makatapos kag makakita sang mas maayo nga trabaho, apang kaangay nga ginapakalain pa sang bata ang ila mga pahanumdom.

Nagpangamuyo man ini nga magbag-o ang pinsar sang ila nga bata kag wala sang himuon nga indi amo.

Wala man sila sang may nakita nga armas-luthang sa bag sang suspetsado sang maghalin sa ila balay, gani wala ini nakahibalo kun diin sini ginkuha ang cal. 38 revolver nga gingamit sa krimen.

Suno sa iloy, nagcontact pa na ini sa tiyo sang suspetsado sa Guimaras agud nga ini ang malaygayan, apang kaangay nga ginpatalikod lang sini ang iya mga himata kag nadula.

Makaligad sang pila ka oras, nabalitaan nalang nila nga ginsulong sini ang mga biktima sa Guimaras State University kag ginpatay.

Para kay Mrs Sereño, mabuot nga bata si Piamonte bangod ini ang nagataha gid kun mag sugilanon sa ila.

Gani dapat man nga atubangon sang ila nga bata sang iya ginhimo.