BACOLOD CITY-Amat-amat karun nga nagkuha sang interes sang mga pumuluyo sa ciudad sang Bacolod ang imahe ni Our Lady of Fatima sa isa ka pribado nga chapel sa isa ka puluy-an bangud gina-alegar nga nagaluha ini sang dugo.
Ang imahe ang ginapanag-iyahan sang ginkilala lamang kay Si Jun kag tuig 2004 sang iya ini ginbakal sa St. Paul sa Manila bilang regalo sa iya iloy.
Madugay nga tinion nga wala ginsapak ang imahe sa ila puluy-an bangud nga nawasak ang tiil sini subong man ang abaga.
Apang suno kay Sir Jun, Hulyo 28, 2013, ginpadamgo ini sa diin siya ang ginhatagan sang sulat nga nagahingyo sa iya nga magpangamuyo sang rosaryo nga seryoso kag ang nakapirma sa nasambit nga sulat amo ang ngalan nga Mariam nga buot silingon sa Quoran, Maria.
Matapos ang insidente, ginplastar ni Sir Jun ang imahe ni Our Lady of Fatima sa tunga sang altar kag sang Agosto 7 tubtob 21, 2013 ginpahayag nga una ini nga nagluha sang dugo apang gintago lamang nila ini.
Suno kay Sir Jun, nagaluha ang imahe sa tion nga may dalagkuan nga hitabo sa pungsod.
Madumduman nga Noviembre 2013 natabo ang paglaslas sang Bagyo Yolanda kun sa diin linibo ka mga tawo ang nagkalamatay sa Pilipinas.
Suno diri, nagluha man sang dugo ang imahe sang paglupok sang isyu sang Reproductive Health (RH) Bill.
Suno pa diri, makaapat ka beses na nga nagluha sang dugo ang imahe kun sa diin ang pinakaulihi natabo sang Hulyo 7, 2018.
Nagapati si Sir June nga may angut naman ini sa nagakahanabo karun sa tunga sang gobyerno kag simbahan sa diin sang damlag lang gintawag ni Presidente Rodrigo Duterte nga istupido ang Ginoo.
May pila ka mga prominente nga tawo nga nagabisita sa pribado nga chapel kag nagapangamuyo kalakip na ang isa ka akalde nga naghingyo nga magbusong ang iya asawa kag natuman ini.
Indi luyag sang tag-iya nga ibuyagyag ang ila lugar agud indi ini pagdugukan sang tawo bangud luyag sini mapabilin nga pribado.
