Paghimo sang maayo nga binuhatan, pag-ulikid sa mga pigado kag pagpalapta sang maayo nga balita ang mensahe sang imam sang Muslim community sa Bacolod City subong nga nag-umpisa na ang Ramadan.
Sa interview sang Bombo Radyo Bacolod kay Imam Abu Aljannah Nadela Carcauga, sumugod alas-12:00 sang kaagahon, gin-umpisahan na nila ang pagpu-asa ukon fasting, kag sila ang liwat na lamang magakaon kag maga-inom sa alas-6:00 sang gab-i.
Ang fasting ang magapadayun sa sulod sang isa ka bulan.
Paathag ni Carcauga, nga indi gid man dulungan ang pag-umpisa sang Ramadan sa iban nga pungsod, bangod sa naglainlain nga time zone, kag tion sang pagpakita sang New Moon.
Sa Ramadan, sila ang masako man sa mga pagsimba sa ila nga mga Mosque kag pagpangamuyo kay Allah.
Mensahe sini sa mga Muslim nga dumdumon si Allah paagi sa pagbasa sang Quran, sa paghimo sang maayo nga binuhatan, pagbulig sa mga pigado, kag pagpangamuyo sang lima ka beses sa kada adlaw.
