Mahimo nga madismiss sa serbisyo ang investigator sang Bacolod Police Station 2 nga nadakpan sa entrapment operation sang Integrity Monitoring and Enhancement Group Visayas Field Unit nga nagabaligya sang illegal nga armas luthang.
Suno kay Bacolod City Police Office (BCPO) Director Col. Thomas Joseph Martir, naaresto si Police Staff Sergeant Gerwin Catolico, investigator sang Police Station 2 matapos ang ginpatigayunan sang entrapment operation kun sa diin ginbaligyaan sini ang poseur buyer sang caliber .45 pistol sa balor nga P12,000.
Natigayon ang transaksyon sa Barangay Estefania, Bacolod City kun sa diin narecover ang isa ka calibre .45 pistol nga may unod nga duha ka magazine, P12,000 nga mark money kag isa ka unit sang cellphone.
Suno kay Martir, gilayon siya nga nakig-angot kay Police Captain Paul Vincent Pendon, station commander sang Bacolod Police Station 2 kag suno diri, una na nga narelieve sa Bacolod si Catolica bangud sa mga involvement sini sa mga alegasyon apang matapos ang pila ka tuig, ini ang ginbalik sa ciudad.
Suno sa BCPO director, wala gid ini nakahibalo nga may nagakatabo nga amu sini sa mga personnel.
Gindugang man sini nga hugot nga ginadumilian sa pag-imbolbar sa illegal nga mga aktibidad ang mga kapulisan sa idalum sang internal cleaning policy.
Suno kay Martir, posible nga madismiss si Catolico sa serbisyo kag magapangatubang sang kaso nga paglapas sa R.A. 10591 kag Comelec Gun Ban.
Sa karun yara ini sa kustodiya sang Criminal Investigation and Detection Group.
Nagpanugyan man ini sa mga personnel nga indi makigbahin sa mga illegal nga aktibidad bangud kanugon sang ila pinangabudlayan bilang isa ka pulis.
