Suguran na sang Commission on Human Rights sa masunod nga semana ang imbestigasyon angot sa ginaalegar engkwentro sa tunga sang New People’s Army kag mga suldado sa Purok Lubi, Barangay Tabugon, Kabankalan City sang Hwebes sang gab-i kun sa diin anom ka alleged NPA members ang nagkalamatay.
Sa interview sang Bombo Radyo kay CHR Negros Occidental head Vincent Parra, may independent investigation ang CHR kun engkwentro sa tunga sang NPA kag Philippine Army ang natabo ilabi na nga ginpahayag sang asawa sang tricycle driver nga si Ruben Gaitan nga indi NPA member ang iya bana gani seryoso ini nga alegasyon.
Suno kay Parra, mahimo nga patigayunon sa masunod nga semana ang imbestigasyon bangud may mga daan nga kaso sa southern Negros nga ginatapos pa sang ila opisina kag may mga bag-o pa gid nga mga kaso, lakip na ang ginsalvage nga duha ka lalaki sa Barangay Dulao, Bago City.
Suno kay Parra, seryoso ang insidente kun matuod nga nagabusong ang isa ka babayi nga napatay sa alleged encounter gani nagawarrant ini nga magpatigayon sang independent investigation.
Suno sa CHR official, mapadala sila sang sulat sa Philippine Army kag magabisita man sa Kabankalan City Police Station bangud sila ang una nga responders.
Apang kun identified naman ang mga biktima, nagakadto ang CHR investigator sa pamilya agud nga magpatigayon sang interview sa pagkolekta sang dugang nga impormasyon.
Suno kay Parra, may financial assistance nga ginahatag ang CHR sa pamilya sang biktima kun tuman ini ka pigado.
