Suportado sang grupo sang mga manunudlo sa Bacolod ang ginaduso nga imbestigasyon sa indi maayo nga kalidad sang bugas nga ginhatag sa public school teachers bilang kabahin sang one-time rice allowance sang gobyerno.
Suno kay House Deputy Minority Leader kag ACT Teachers’ Party-list Rep. France Castro, nakabaton sila sang report nga ang bugas nga ginhatag sa Nueva Ecija, Mindoro, Bacolod City kag Zamboanga del Norte ang indi makaon ukon inedible.
Sa interview sang Bombo Radyo kay Richard Gelangre, presidente sang Bacolod City Public School Teachers Federation, mas maayo nga maimbestigaran ang kalidad sang bugas nga ginpanagtag sa mga manunudlo sa bilog nga Pilipinas.
Sa pagtambong ni Gelangre sa national council sang Alliance of Concerned Teachers, nakit-an nga indi lang sa isa ka probinsya ang manubo nga kalidad nga bugas kundi sa bilog nga pungsod.
Ang common nga reklamo sang mga lider sang mga teachers group amo ang bahay nga bugas, daan, may presensya sang hukaw kag halos indi na makaon sang tawo.
Bangud sini, ginaduso ni Rep. Castro nga imbestigaran ang ginhatag nga rice assistance in aid of legislation agud makita sang mga lawmakers nga indi maayo ang kalidad sang bugas nga ginhatag sa mga manunudlo.
Suno kay Gelangre, wala ini nagakahulugan nga ungrateful ang mga manunudlo kundi nagapabutyag sang ila sentimyento sa halos indi makaon nga bugas.
Sa karon, ginatipon nila ang report sang mga teachers league sa Bacolod kun ano nga eskwelahan ang nakabaton na kag kun sila ang may reklamo.
Naistorya man sini ang branch manager sang NFA Negros Occidental nga nagpromisa nga mahimo ini sang tikang agud masiguro nga maayo ang kalidad sang bugas nga ila igahatag sa mga manunudlo nga wala pa nakabaton.
Suno kay Gelangre, masakit panumdumon nga ido nalang ang makakaon sang bugas nga gingastuhan sang pondo sang gobyerno.
