Para sa isa ka abogado mas maayo nga itugyan sa national office sang National Bureau Of Investigation ang pag-imbestiga sa utod nga nawala nga kamot, nawala nga tiil kag pares sang dulunggan sang tawo nga ginbilin sa gwa sang NBI-Bacolod Office sang Biyernes sang kaagahon, agud nga wala sang bias nga matabo.
Sa interview sang Bombo Radyo Bacolod kay Atty. Jomax Ortiz, isa ka seryuso nga insidente ang pagbilin sang ginchop-chop nga parte sang lawas sang tawo, ilabi na nga ini ang ginbilin sa NBI- Bacolod kag naangot pa ang pangalan sang isa ka Special Agent sang ahensya.
Suno diri, ang NBI mismo ang eksperto sa pagresolba bangod nga sila ang mas nakaintindi kun ano ang kamatuoran sa likod sini, samtang ang kapulisan naman ang mangin supporting agency.
Opinyon sang abogado, mas maayo kun itugyan ang insidente sa national office sang NBI agud nga wala sang bias nga matabo nga kun ang lokal ang maggatrabaho sang imbestigasyon posible nga madamo sang palamangkotanon ang magluntad.
Pahayag ni Ortiz, madamo sang krimen kag krisis ang nagaluntad kag iban diri ang may kaangtanan pa sa mga tawo nga indi basta-basta makontra.
Suno kay Ortiz, ini ang realidad kun sa diin madamo sang kaso ang wala nasolbar kag wala mahatagan sang hustisya.
