May yara na sang pila ka developments ang imbestigasyon sa pagpatay sa general manager sang Northern Negros Electric Cooperative, Inc. (NONECO) suno sa city director sang Bacolod City Police Office (BCPO).
Sa interview sang Bombo Radyo Bacolod kay Police Col. Thomas Joseph Martir, kahapon may yara na sang ginpatigayon nga Special Investigation Task Group (SITG) conference nga gintambungan sang iban nga government agencies kag sang mga kapulisan.
Suno kay Martir, ang mga kapulisan nga ginbutang sa SITG ang may tagsa-tagsa ka ginaubra agud matutukan ang imbestigasyon sa pagpatay kay Atty. Danny Pondevilla, general manager sang NONECO nga ginpatay sang December 21.
Suno diri, may natipon na sila nga kopya sang cctv footages angot sa pagpatay kay Pondevilla apang indi pa mashare sa publiko bangud ini ang magaserbe nga ebidensya batok sa wala pa natumod nga suspetsado nga nagpatay sa NONECO general manager.
Wala pa matumod sang mga otoridad kun ginpatay ang biktima sa sulod sang iya salakyan.
Nagapati ang BCPO city director nga mahatagan sang hustisya ang kamatayon sang general manager sang NONECO.
