Nagsugod na subong nga adlaw ang Council of Concerned Citizens ukon C-Three sa pag-imbestigar sa mga flood control projects sa ciudad sang Bacolod.
Sa interview sang Bombo Radyo kay former Councilor Renecito Novero, kapin 500 ka mga miyembro sang C-Three ang nagtambong sa Trillion Peso March nga ginpatigayon kahapon humalin sa Provincial Capitol Lagoon padulong sa Bacolod Public Plaza.
Suno kay Novero, sila ang nagapakig-unong sa kasubo kag kaugot sang bug-os nga Pilipinas sa pagpangawat sang kaban sang pungsod.
Nagalaom ini nga mabatyagan sang mga yara sa pwesto ang hingyo sang nagkalain-lain nga sektor kag sila ang mahuya, magresign kag mabuslan sang matarong nga mga lideres kasubong man nga siya ang nagalaom nga mabatian sang kalangitan ang pangamuyo sang mga pumuluyo.
Alas-7:00 kaina sang aga, nagsugod ang inspection kag pag-imbestigar sa mga flood control kag infrastructure projects sa Bacolod City.
Suno diri, may yara sang kapin 138 ka mga flood control projects nga natukod humalin sang nagliligad nga mga tinuig kag iban diri, palarehos nga nagabalor sang P96.5 million nga kwestiyonable kag nagapakita nga may anomaliya.
Nagapati si Novero nga indi dapat mag-untat ang tanan sa pagsinggitan lamang kundi dapat mag-imbestigar kag maprosecute ang mga kawatan sa gobyerno agud mapakita nga sila ang seryoso sa pagpangayo sang hustisya.
