Padayon ang imbestigasyon sa gina-alegar nga pag-abduct sa isa ka 3rd year college student nga babayi sa ciudad sang Bacolod kag nakit-an sa ciudad sang Bago.
Sa interview sang Bombo Radyo Bacolod kay Police Captain Francis Depasucat, station commander sang Bacolod Police Station 4, pasado alas- 8:00 sang gab-i sang Miyerkules, nagalakat ang biktima sa dalan Burgos sa ciudad sang Bacolod para magbakal sang sud-an sang may nagbalabag sa iya nga puti nga van kag pwersado nga ginsulod ini sa salakyan.
Sa sulod sang van may apat ka mga lalaki nga suno sa biktima wala sang tabon ang ila mga nawong.
Ginhigtan sang straw ang liog sang biktima kag ini ang naka-angot man sa higot sa iya kamot.
Kapin, alas- 10:00 sang gab-i nag-untat ang van sa bahin sang Barangay Sampinit ciudad sang Bago, kag nanaog ang duha ka mga lalaki para manigarilyo kag mangihi.
Bangod nga may gamay nga bukas ang salakyan, nagka-tsansa ini nga maglumpat kag malagyo.
Kasunod sini ang biktima ang nakit-an sa mga nagapangita sang damang kag gilayon nga gindala sa Bago City Police Station.// Suno kay Depasucat, padayon pa nga ginareview ang mga CCTV footage sa area kun diin nakit-an ang biktima.
Dugang pa sini, wala man sila sang may nabaton nga report sang Miyerkules sang gab-i nga may gin-abduct sa ila nga area of responsibility apang nakabaton na lang sila sang impormasyon gikan sa Bago City Police Station angot sa natabo nga abduction.
Pahayag ni Depasucat, madamo sang area sa lugar kun diin gin-abduct ang biktima kag sa karun pabag-o bag-o pa ang statement sini.
Ginhatagan anay sang tion ang biktima nga magpahuway kag sa pagbalik sini, ginalauman ni Depasucat nga makahatag na ini sang mas klaro nga statement.
