Nagpagwa sang Immigration Lookout Bulletin Order (ILBO) ang Bureau of Immigration batok kay Senator Ronald “Bato” Dela Rosa suno kay Acting Justice Secretary Fredderick Vida.
Suno diri, ginmanduan niya ang mga otoridad nga dakpon si Dela Rosa sa tion nga magtinguha ini nga maghalin sa pungsod, bangud ginakabig ini nga “contempt of justice.”
Ang nasambit nga tikang ang may kaangtanan sa arrest warrant naggikan sa International Criminal Court (ICC) batok sa senador, angot sa ginaalegar crimes against humanity.
Madumduman nga ginpaidalom sa protective custody sang Senado si dela Rosa matapos gintuyo nga ipatuman sang National Bureau of Investigation ang warrant batok sa iya. Apang sang ulihi, ginreport nga naghalin na ini sa Senate building sang kaagahon kag wala pa mahibaluan sa karon kun diin na ang senador.
Ginpaathag sang DOJ nga wala ini nagakahulugan sang manhunt, apang may yara sila sang impormasyon nga gina-imbestigaran agud mahibaluan ang lokasyon ni dela Rosa.
Ginkumpirmar man sang departamento nga may existing ICC warrant kag nabaton na sang Pilipinas ang request para sa execution sini.
Padayon naman ang pagpakig-angot sang DOJ sa Senado kag sa mga legal nga proseso samtang ginahulat pa ang desisyon sang Korte Suprema.
