Ginkumpirmar sang public information officer sang Department of Public Works and Highways (DPWH) Bacolod nga sang tinalikdan nga tuig pa nagsugod ang implementasyon sang Drainage Master Plan sang Bacolod.
Sa interview sang Bombo Radyo kay Engr. Helen Esperancilla, public information officer sang Department of Public Works and Highways – Bacolod, sang 2013, may ginhire nga consultant ang Region 6 agud tun-an ang pagbaha sa Western Visayas kag nalakip ang Bacolod sa mga recipient.
Suno kay Esperancilla, ang feasibility study sang 2013 ang wala nafundingan gani nagcome up sang bag-o nga pagtulun-an sang 2020.
Tatlo ka mga areas ang ginacover sang total funds nga ginalakipan sang suba, national road kag local road.
Sa urban drainage suno sa iya, as of 2020, P1.1 billion ang costing apang sang 2021, wala nakapagwa sang pondo.
Sang 2022, nakacome-up ang kongresista kag alkalde sang plano nga P75 million fund.
Suno diri, sa 2023, may palaabuton nga mga proyekto nga sini gid lamang narelease ang award kag ginalauman nga sini nga semana, magasugod na ang iban nga nabid-out nga proyekto.
Suno sa iya, ang first phase pa lamang ang nahatagan sang pondo sang 2021 kag nagacover ini sang mga area nga masami nga ginabaha.
Nagsugod na ang construction sini sang Mayo sang tinalikdan nga tuig kun sa diin gin-una ang Barangay Bata, Mandalagan, Taculing, Tangub, Cabug, Barangay 3, 4, 7 kag 39.
Suno kay Esperancilla, ang nasambit nga mga barangay ang gin-una kag ginhimo prayoridad bangud sila ang masami nga ginabaha.
