Pungkuan pa sang mga School Heads sa pribado nga mga unibersidad kag kolehiyo ang proseso sa pagpatuman sang “no permit no exam prohibition act”.
Nahibaluan nga ang layi ang nagacover sa tanan nga public kag private institutions halin kinder tubtob kolehiyo.
Kun sa diin ang mga ginakabig disadvantaged students ang dapat pahanugutan nga makakuha sang periodic kag final examination apisar nga wala sang permit ukon wala pa nakabayad sa tuition.
Sa interview sang Bombo Radyo Bacolod kay Dr. Mark Molina, executive vice president sa STI West Negros University, ginarespeto nila ang perspective sang mga mamalidha, apang aminado ini nga may epekto sa mga private schools ang pagpatuman.
Pahanumdom sini nga ang revenue sang mga manunudlo kag mga balayran sa utilities sang mga private schools ang nagasandig sa revenue nga matipon gikan sa tuition fees sang mga estudyante.
Paathag sini nga sa enrollment pa lamang, napatpat na sa mga ginikanan kag sa kabataan kun pila ang down payment kag pila ang monthly dues ukon balayran sa tion sang exam.
Apang pasalig sini nga kun ma-alang alang kag indi gilayon makabayad, sarang man nga makapadulong sa opisina sang dean agud mag-ayo nga magpromisory note anay.
Sa “no permit no exam prohibition act” may-ara naman sang qualification nga ginakonsiderar kun sa diin ang estudyante ang dapat nga ginakabig “disadvantaged” sector sa sosyodad.
Sa karun, yara sa 15 porsyento sang mga estudyante sa STI West Negros University ang nagapalapit sa dean agud maghingyo sang promisory note.
Dugang pa sini nga sadto paman, ginahatagan naman sang konsiderasyon ang mga estudyante nga nahalitan sang mga kalamidad.
Nagapati si Molina nga ang layi ang standardization na lamang sa kun ano ang madugay na nga ginapractice sa kolehiyo.
Apang ang pagpatuman ang dapat pa matun-an bangod nakita man sini nga kun tuman ka damo sang indi makabayad sang tuition fees on time, madelatar man ang sweldo sang mga empleyado.
