Ginpasanyog pa sang Negros Occidental Police Provincial Office ang ila implementasyon sang search warrants nga nagatarget sang mga loose firearms.
Ini ang kabahin sa efforts sang NOCPPO agud maseguro ang malinong kag matawhay nga 2025 National and Local Elections.
Humalin Enero 1 tubtob Pebrero 16, ang NOCPPO ang nakapatigayon na sang 15 ka search warrant operations nga nagresulta sa pagka-aresto sang 12 ka mga suspetsado kag pagkumpiskar sang 14 ka armas-luthang.
Ang ginpasanyog nga estratihiya ang ginahimo sang kapulisan agud mabatuan ang pagduging sang mga indi lisensyado nga mga armas nga masami ginagamit sa mga kriminalidad kalakip na sa posibilidad sang Election-Related Incidents.
Magluwas diri, humalin sang ginpatuman ang Commission on Elections (COMELEC) Gun Ban humalin Enero 12 tubtob Pebrero 16, may-ara naman sang 14 ka mga narecord nga paglapas, nga nagresulta sa pagkaaresto sang 13 ka mga suspetsado kag pagkumpiskar sang 13 ka armas luthang kaupod ang 22 ka rounds sang bala sang nanarisari nga kalibre sang armas.
Sa interview sang Bombo Radyo Bacolod kay NOCPPO Spokesperson Police Captain Judesses Catalogo, ang mga recoveries ang indi gikan sa Comelec checkpoints kundi sa mga operasyon kalakip na ang drug buybust operation apang nagakakuhaan sang armas luthang ang mga suspects.
Samtang may-ara man sang mga ginaturn-over paagi sa armas-baylo bugas nga inisyatibo.
Magluwas sa ginpasanyog nga kampanya sa loose firearms, ang NOCPPO ang nakapatigayon man sang 25 ka drug buybust operations kag naka-aresto sang 47 ka mga drug personalities.
Ang illegal nga droga ang nagdangat sa 308.9 grams ukon balor P2,103,556.
May 20 naman ka napatigayon nga anti-gambling operations kun sa diin lima ang nadakpan kag nakumpiskar ang pusta nga nagdangat sa P5,258.
Sa pagserbe sang warrant of arrest sa mga wanted persons, 15 ka operasyon ang ginpatigayon batok sa Most Wanted Persons kun sa diin 15 man ang nadakpan, samtang 94 ka operasyon naman batok sa Other Wanted Persons kag 93 ang nadakpan.
