Importasyon sang baboy gikan sa Spain, liwat na nga ginpahanugotan sang Department of Agriculture

Ginbawi na sang Department of Agriculture (DA) ang temporaryo nga pagdumili sa importasyon sang baboy kag iban pa nga swine products nagikan sa Spain.

Kasunod ini sa pagkilala sang Pilipinas sa regionalization efforts sang pila ka mga pungsod sa Europe angot sa pamahog nga dala sang African Swine Fever (ASF).

Sa idalom sini, ang mga pungsod nga may pamahog sang balatian sa kasapatan ang ginapain sa specific zones sa baylo nga ipaidalom sa nationwide trade restrictions.

Suno kay Agriculture Secretary Francisco Tiu Laurel Jr., kalakip sa mga mahimo nga liwat nga i-import halin sa Spain amo ang karne kag panit sang baboy kag iban pa nga swine by-products.