Nadesisyunan sang Department of Agriculture kag Sugar Regulatory Administration nga ipaiway ang importasyon sang kalamay tubtob wala pa matapos ang pagtapas sang tubo sa tunga-tunga sang tuig 2025.
Nadihon ang nasambit nga desisyon matapos ang meeting nga ginpatigayon nanday Agriculture Secretary Francisco P. Tiu Laurel, Jr. kag Sugar Regulatory Authority Administrator Pablo Luis Azcona, Board Member Dave Sanson, kag Andre Corro, sadtong Huwebes, Nobyembre 7.
Ginpahayag ni Secretary Laurel nga indi pa kinahanglanon sang dugang nga importasyon sang kalamay bangod estable kag bastante pa ang domestic supply sang raw kag refined sugar.
Ginkasugtan ni Azcona kag Laurel nga wala sang may matabo nga importasyon sang kalamay tubtob sa Mayo ukon Hunyo 2025 bangod nagapanugod pa lamang ang pagpanapas sang tubo sa Pilipinas.
Suno sa SRA nga ang pagnubo sang sugar content kada tonelada sang tubo ang bangud sang El Niño gani kinahanglan sang mangunguma nga padugayon ang ila nga pag-ani agod ang tubo ang magulang kag mangin mataas ang sugar content sini.
