WASHINGTON – Ginpahayag ni US President-elect Donald Trump nga ang inagurasyon sini sa Lunes ang pagasayluhon sa sulod sang US Capitol sabaylo nga sagwa bangud sa tuman katugnaw nga temperatura sa labing-una nga tinion sulod sang 40 ka tuig.
Suno kay Trump indi sini luyag nga masamaran ukon masakitan ang mga pumuluyo bangud sa tuman katugnaw nga tyempo.
Suno pa sa president elect nga nagmando ini nga ang inagurasyon kag ang mga pangamuyo kag iban nga speeches ang patigayunon sa United States Capitol Rotunda.
Ang ulihi nga inagurasyon nga gin-isol bangud man sa tuman katugnaw ang panahon amo ang sang 1985 sang ikaduha nga pagpanumpa ni anay Republican President Ronald Reagan kun sa diin ang nagnubo ang temperatura sadto sa minus 10 tubtob 20 degrees Fahrenheit ukon minus 23 tubtob minus 29 Celsius.
Ginalantaw sa weather forecast para sa Washington sa Lunes nga ang temperatura sa tion nga magapanumpa si Trump ang mangin 19 F ukon minus 7 degrees C apang mangin mas matugnaw pa bangud sa paghuyop sang hangin.
Suno kay Trump nga ang mga supporters ang mahimo maglantaw sa screens sa sulod sang Capital One Arena, angports venue sa downtown Washington nga makaakomodar sang 20,000 ka mga tawo.
Ginpahayag man sini nga ang iya nga presidential parade ang natalana nga pagalakipan sang marching bands kag iban nga grupo nga magapadara padulong sa Pennsylvania Avenue nga magalabay sa White House, kag magasulod sa Capital One Arena.
Indi pa maathag sa karun kun paano ang pagorganisar sang parada sa sulod sang nasambit nga arena.
