BACOLOD CITY – Opisyal na nga nagpanumpa sa pwesto ang mga opisyales sang ciudad sang Bacolod para sa termino nga 2019-2022.
Sadtong Hunyo 25, nagpanumpa si Bacolod City Mayor Evelio Leonardia kay Pangulong Rodrigo Duterte sa Malakanyang apang nangin engrande gihapon ang inauguration ceremony sa Bacolod City Government Center, Hulyo 1 sang gab-i.
Nagtambong ang duha ka highest-ranking officials sang Senado, duha ka ambassadors, opisyal sang US Embassy kag ang richest congressman sa pungsod.
Si Leonardia ang nagsumpa kay Senate President Vicente “Tito” Sotto III.
Nagsumpa naman si Bacolod City Lone District Congressman Greg Gasataya kay Senate Majority Leader Juan Miguel Zubiri; samtang si Vice Mayor El Cid Familiaran ang nagsumpa kay Comelec Commissioner Rowena Guanzon bangud wala nakaabot si Senate Minority Floor Leader Franklin Drilon.
Samtang, ang mga newly elected kag re-elected councilors ang nagsumpa naman kay 1-Pacman Party-list Rep. Michael Romero nga richest member sang House of Representatives sa 17th Congress.
Magluwas sa Philippine officials, nagtambong man sanday Russian Ambassador Igor Khovaev, South Korean Ambassador Dong-man Han, kag US Embassy Political Section – Internal Political Unit chief Joshua Morris.
Wala man nakatambong apang nagpadala sang mensahe para sa Bacolod City officials si President Rodrigo Duterte.
Nahibaluan nga 14 ka mga opisyales sang Bacolod ang nagikan sa isa lang ka partido kag isa lang ka konsehal (Councilor Wilson Gamboa) ang nagikan sa karibal nga political party ni former Congressman Monico Puentevella.
