Ginahingyo sang incident officer sa Incident Command Center sang Canlaon City Government nga sila ang mahatagan sang updates sa kahimtangan sang bulkan bangod ini ang mangin basihan man sa ila nga mga pagpatuman.
Sa interview sang Bombo Radyo Bacolod kay City Health Officer Dr. Elmer Impealis, sila ang nagalantaw lamang sa update sa website sang Philippine Institute of Volcanology and Seismology (PHIVOLCS).
Panawagan sini nga kuntani sila ang hatagan sang derekta nga impormasyon agud updated man ang ila nga hulag, ilabi na nga ini man ang ila nga ginabantayan kun papulion na ang mga evacuees.
Ginapakamaayo na lamang sini nga nagtahaw na ang sitwasyon sang bulkan kag gamay na lamang ang ashfall kag aso sa bulkan.
Ginapasalamat na lamang sini nga bangod sa Hangin Habagat, limitado lamang ang naapektuhan sang paglupok sang Bulkan Kanlaon, sa baylo ang ashfall kag baho sang asupre ang nagderetso sa Negros Occidental.
Pangabay sini nga ma-untat na ang pag-alburuto sang bulkan kag wala na sang dugang nga maperwisyo.
