Patay ang Incident Commander sang Interagency Task Force kag City Health Officer sang Guihulngan City, Negros Oriental kag ang bana sini matapos gintiro sang riding in tandem suspects alas 5:20 kahapon sang hapon.
Papauli na kuntani si Dr. Mary Rose Sancelan kag ang iya bana nga si Edwin Sancelan sa ila puluy-an sa Carmin Ville Subdivision, Brgy. Poblacion, Guihulngan City nagikan sa trabaho sang sila ang ginluthang sang makapila ka beses sang wala pa makilal-an nga mga suspetsado.
Nakaangkon sang nagkalain-lain nga igo sang bala ang mag-asawa lakip na sa ulo.
Ginaalegar nga ginbantayan ang mga ini sang mga suspetsado sa sagwa sang subdivision kag matapos ginluthang, nagpadulong sila sa wala nahibaluan nga direksyon.
Narekober sa crime scene ang 15 ka mga cartridges sang calibre .45 pistol.
Sa karun nagapadayon pa ang imbestigasyon sang kapulisan.
