Gin-activate na sang Local Government Unit sang La Castellana, Negros Occidental ang ila nga Incident Management Team.
Sa interview sang Bombo Radyo Bacolod kay La Castellana Mayor Rhumyla Nicor-Mangilimutan, kahapon nagconvene sila agud nga estoryahan ang mga preparasyon angot sa posible nga evacuation inkaso mag-abiso ang Philippine Institute of Volcanology and Seismology (PHIVOLCS).
Suno kay Mangilimutan, ginapreparahan man kun magpadayon ang mapanimahuan nga asupre, degassing kag volcanic quakes.
Suno sa alkalde nag-issue naman ini sang executive order agud nga isuspend ang klase all levels bangud sa aktidad sang Bulkan Kanlaon, kag ini ang pagabatakon kun may yara na sang abiso ang PHIVOLCS kag kun maghagan-hagan na ang aktibidad sang bulkan.
Samtang nagakahangawa naman ang mga residente sa posible nga paglupok liwat sang Bulkan Kanlaon bangud maapektuhan naman ang ila nga gintanum nga mga utan.
Ginpahayag man sang alkalde nga subong pa lamang kuntani makabawi ang mga apektado nga mga residente bangud nagaulan-ulan na kag nagaamat-amat na kuntani panambok ang mga pananom.
Nagpanugyan man ini sa mga residente nga mag-aligmat kag maghulat sang mga advisories nga ginapagwa sang PHIVOLCS bangud bisan ano nga oras may posibilidad nga maglupok ang Bulkan.
Suno diri, isa man sa tinutuyo nga ginsuspend ang klase amo nga maprotektahan ang mga kabataan nagikan sa baho sang asupre.
