Nagnubo sang 40 porsyento ang income sang mga manugbaligya sang bulak sa ciudad sang Bacolod subong nga tigkalalag kun ipaanggid sang mga tinuig nga wala pa sang COVID pandemic.
Sa interview sang Bombo Radyo kay Glenn Amar, presidente sang Bacolod City Flower Vendors Association, halos katunga ang ginnubo sang numero sang mga nagabakal antes ang closure sang patyo subong nga adlaw kun ikumparar sang tuig 2019.
Sa kinaandan suno kay Amar, ginakulang ang supply sang bulak kun Nobyembre 1 kag 2 kun sa diin ginabalibaran nalang ang iban nga kustomer bangud wala na sang bulak, apang subong may bilin pa sa gin-arrange nga set.
Ang iban naman ang temprano pa nagbakal, ilabi na ang halin sa out of town.
Suno kay Amar, mas barato ang presyo kun temprano pa magbakal samtang amat-amat naman nga nagmahal samtang nagahilapit ang Oktubre 30 bangud nagpasaka man sang presyo ang supplier.
Ang set nga nagabili sang P200 sang Oktubre 25 ang nahimo na nga P300 kahapon.
Suno kay Amar, wala naubos ang ila ginpreparar sa alat apang indi man dako gid ang kapierdihan bangud indi man madamo ang supply nga nag-abot nagikan sa Benguet, Cebu, Davao kag Manila.
Sa karon, nagbalik na sa normal ang presyo sang bulak.
Nagalaom naman si Amar nga magabalik na sa normal ang tanan sa masunod nga tuig agud nga makabawi ang ila income.
Suno diri, fully vaccinated na ang kalabanan nga flower vendors samtang ang iban naman ang wala pa nakadesisyon nga magpabakuna bangud sa pila ka kabangdanan.
