Nagpanugyan ang Independent Animal Welfare Advocate & CARE Volunteer sa syudad sang Bacolod nga magpatigayon sang paandam agud nga masiguro ang comforts kag safety sang mga hinuptan nga sapat kadungan sang selebrasyon sang bag-ong tuig.
Suno kay Mary Grace Gonzales, ginpahayag sini nga nagahatag sila sang precautions nga mahimo makuha sang komunidad bangud madamo na sila sang nabaton nga reports nga madamo ang nagakaladula nga mga ido sa tion sang New Year.
Ang mga paandam nga ginalakipan sang, indi pagkadena ukon paghigot ang mga hinuptan nga sapat ilabi na ang ido bangud tuman ka sensitive ang mga ini gani kun makibot mahimo ang mga ini makuga sang higot kun magpanic sa tion nga makabati sang palupok.
Nagpanugyan man ini nga kun may tambungan nga fireworks display indi na pagdal-on ang mga ido agud malikawan ang anxiety sa mga ini.
Suno diri mahimo man nga ibutang ang ido sa isa ka kwarto agud malikawan nga may magkalabuka nga mga gamit sa tion nga magsala ang mga ini.
Suno kay Gonzales tinutuyo sang ginapatigayon nga information dissemination ang paghatag sang ihibalo sa publiko agud nga mabuhinan ang mga layaw nga mga ido bangud nagakadugangan ang mga ini sa tion nga madula kun magpanic bangud sa palupok kadungan sang pagsug-alaw sang bag-ong tuig.
Samtang ginpahayag man ni Gonzales nga bukas man sila sa pagbaton sang mga bulig kag sa mga luyag magvolunteer sa ila organisasyon.
Samtang nagpanugyan man ang Female Dog Trainer sa syudad sang Bacolod nga ipost sa social media ang mga nakita nga ido kag isecure ang mga ini agud nga mas madali nga makita sang tag-iya.
Ginpahayag ni Spy Dekeling nga indi dapat pahugon ukon habuyan sang palupok ang mga ido.
Nagpanugyan man ini nga mahimo kuhaan sang video kag litrato ang mga nakita nga mga naga-abuso sa mga ido kag ipost sa social media kag itag sa animal welfare group agud nga maimbestigaran kag mahatagan sang nakaigo nga bulig.
