Personal nga ginpasa ni Ferdinand Etabag Diego alias Bongbong Gorilla sang Barangay Gatuslao, banwa sang Candoni, Negros Occidental ang iya nga Certificate of Candidacy sa pagka-gobernador sang Negros Occidental, kahapon, Oktubre 2.
Si Diego, 50 anyos ang nag-AWOL nga police kag ini ang graduate sang Philippine National Police.
Siya ang personal nga nagpadulong sa social hall sang Provincial Capitol agud nga magpasa sang iya nga Certificate of Candidacy.
Sa interview kay Negros Occidental Provincial Election Officer Atty. Ian Lee Ananoria, ginbaton nila ang COC ni Diego bangud kumpleto man ini kag wala man ini sang kinahanglan nga Certificate of Nomination and Acceptance (CONA) bangud wala man ini sang Partido.
Suno kay Ananoria, batunon gid nila dapat ang tanan nga mga nagafile sang COC nga kumpleto man ang detalye.
Suno diri, ang legal office lamang sang COMELEC central office ang may otoridad sa pagdeklarar sang nuisance candidate.
Nangin matawhay man ang ikaduha nga adlaw sang filing sang Certificate of Candidacy sa probinsya sang Negros Occidental.
Kahapon, nagfile man sang iya nga Certificate of Candidacy ang asawa sang alkalde sa ciudad sang Talisay nga si Atty. Rowena “Weng” Lopez-Lizares bangud magapapili ini nga alkalde sa ciudad.
Kaupod sini nga nagfile amo si Talisay City Vice Mayor Jose Nic Jalandoni kaupod ang napulo ka konsehal sa idalom sang Partido Kusog Talisaynon (PKT).
Samtang subong nga adlaw, Oktubre 3, magafile naman si Negros Occidental Governor Eugenio Jose “Bong” Lacson sang COC para magpareelect bilang gobernador sang probinsya.
