Wala ginatolerar sang pamunuan sang Bacolod Environment and Natural Resources Office (BENRO) ang indi maayo nga ginahimo sang mga empleyado sang ciudad nga nakadestino sa nasambit nga departamento.
Sa interview sang Bombo Radyo Bacolod kay BENRO Head Ma. Fe Tresfuentes, nakaissue na ini sang memorandum sa nasambit nga empleyado nga ginpanaugan sang show cause order sang Mayors Office bangud sa gina-alegar nga nagaserbe bilang fixer sa pagproseso sang business permit sa city hall.
Suno kay Tresfuentes, wala sini ginatolerar ang ginhimo sang isa ka staff sang BENRO kag masami ini nga nagapahanumdom nga indi pag-abusaran ang trabaho.
Ini bangud isa ang ila departamento nga nagaissue sang clearances para sa nagakuha sang business permits.
Nahibaluan nga duha ka mga empleyado sang Bacolod City Government ang ginpanaugan sang shower cause order.
Ang mga gindagdagan sang show cause order amo ang isa ka regular employee sang Bacolod Environment and Natural Resources Office (BENRO) kag isa man ka regular employee sang City Treasurer’s Office.
Ginpahayag sang Bacolod City Legal Office, nga nagbaton sang P40,000 ang empleyado sang BENRO sang Disyembre 2024 sang ini nagserbe bilang fixer samtang ang empleyado naman sang City Treasurer’s Office nagbaton sang P12,000.
