Nakahanda na ang probinsya sang Negros Occidental sang mga tikang agud indi makasulod sa probinsya ang karne sang baboy nagikan sa Luzon kasunod sang kumpirmasyon sang Department of Agriculture nga positibo sa African Swine Fever ang 14 nagikan sa 20 ka samples nga ginpa-usisa sa laboratoryo sa United Kingdom.
Sa interview kay Provincial Veterinarian Dr. Renante Decena, nagahulat nalang sila sang mandu sang central office kun paano iregulate ang shipment sang baboy nagikan sa Luzon padulong sa Visayas.
Apang antes pa man ang kumpirmasyon ni Secretary William Dar Lunes sang aga, handa na ang Negros Occidental suno kay Decena bangud natukod na ang African Swine Fever Task Force nga nagbisita sa mga cold storage, supermarkets kag mga pantalan agud masiguro nga indi makasulod ang pork products nagikan sa mga pungsod nga apektado sang ASF.
Sa subong suno kay Decena, ginabantayan nila ang mga order nagikan sa Luzon nga indi anay makasulod sa probinsya.
Nagpanugyan man ini sa mga nagapanag-iya sang piggery nga indi magdiretso sa ila baboyan kun halin ini sa Luzon kag nakabisita sa piggery sa amo ng rehiyon.
Nagalaom man ini nga magakooperar ang tanan sa task force agud nga magapabilin ng hilway sa ASF ang Negros Occidental.
Gindula sang Department of Agricultural (DA) ang kahangawa sang publiko nga posible magsaka ang presyo sang karne sang baboy kasunod sang epekto sang African Swine Fever (ASF).
Nahibaluan nga nagpositibo sa ASF ang blood samples sang pila ka mga napatay nga baboy sa pungsod suno kay Agriculture Secretary William Dar.
Sa 20 blood samples sang mga napatay nga baboy gikan sa Rizal kag Bulacan nga ginpadala sa United Kingdom (UK), 14 ang nagpositibo sa ASF suno kay Dar.
Suno kay Dar, posible naghalin ang virus sa mga damog gikan sa mga hotel kag restaurant.
Paathag sini, ginabakal sang mga hog raisers ang damog nga P15 kada sako kag ginaderetso bahog sa mga baboy kag wala na ginaluto pa liwat.// Dugang pa sang DA secretary nga wala sang bakuna batok sa ASF.
Ginpasiguro naman sini nga ang 7,416 ka mga baboy sa sulod sang 1-kilometer radius sa mga apektado nga lugar sa Rizal kag Bulacan ang napamatay na.
Suno kay Dar, makabig na karon nga cleared sa ASF ang nasambit nga mga lugar.
Ginpanindugan man sang DOH nga indi makalalaton sa tawo ang ASF.
Nakabaton naman sang tag-3 mil pesos sa kada napatay nga baboy ang mga hog raisers.
Sa karon, ginahulat pa sang DA ang resulta sang isa pa ka laboratory test gikan sa UK agud mahibaluan kun ano ka viral ang naglaton nga virus sa mga baboy nga nangin tunaan sang ASF.
Ginsiguro naman ni Dar nga nakontrol na ang virus antes pa man ini maglapta sa iban nga mga lugar.
