Indi magnubo sa 100 ka mga persona sa Lebanon ang nadulaan sang kabuhi matapos ang lapnagon kag asod-asod nga airstrikes nga ginpatigayon sang Israel sa Hezbollah targets sang Lunes kag nagpaandam sa mga pumuluyo nga mag-evacuate sa mga areas kun sa diin ginatago sang armado nga grupo ang ila mga armas.
Mas ginpasanyog pa sang Israel ang pagpang-atake sini matapos ang mabug-at nga mga cross-border exchanges sa kapin isa ka tuig nga konflikto kadungan sang pagshift sang Israel sang focus sini sa northern border, kun sa diin nagapanghaboy man sang rockets ang Hezbollah sa Israel bilang pagsuporta sa ally sini nga Hamas sa Gaza.
Suno kay Israeli Defense Minister Yoav Gallant, ila pa ginapadalum ang ila pagpang-atake sa Lebanon kag magapadayon ang ila mga tikang tubtob nga malab-ot ang ila goal nga makabalik sang luwas ang mga residente sa ila mga puluy-an.
