Ginabanta nga indi magnubo sa 200 ang mga pamalay nga natupok sa nagluntad nga sunog sa Barangay 27, Bacolod City kaina sang kaagahon.
Ang kalayo ang nag-umpisa pasado alas-12:00 sang kaagahon, nga naglamon sang mga pamalay sa Purok Cheriza 1 kag 2 kasubong man sa Purok Acacia 1.
Sa interview sang Bombo Radyo Bacolod kay Mayor Greg Gasataya, alas-3:11 sang kaagahon nadeklarar nga fire-out, kag gilayon man nga nagpatigayon sang mopping ang Bureau of Fire Protection – Bacolod.
Alas-4:00 sang kaagahon naman nakahalin sa area si Mayor Greg agud tsekyaron ang evacuation center sa gym sang Apolinario Mabini Elementary School.
Suno sa alkalde, ginahulat pa niya ang official pronouncement gikan sa Bacolod City Fire Station kun pila gid ka balay ang nasunog kag kun pila ka pamilya ang nasunugan.
Ginahulat man sang alkalde ang kumpirmasyon kun ano ang rasun sa sunog, bangod suno diri madamo sang version ang mga nasunugan.
Sa karun, gina-asikaso nila nga mapakaon ang mga biktima kag may nadul-ong naman nga folding beds nga magamit sang mga evacuees.
WATCH: https://www.facebook.com/share/v/1A4K74qXwX/
Pasalig ni Mayor Greg nga tinguhaan nila nga mahatag ang nagapanguna nga panginahanglanon sang mga biktima samtang gina-asikaso pa sang Department of Social Services and Development (DSSD) ang verification sang mga nasunugan para sa paghatag sang financial assistance.
Panawagan sang alkalde sa mga luyag magbulig nga magpadulong na lamang sa evacuation site.
May pila naman nga nakita nga ginsakay sa ambulansya, apang wala pa sang verifcation natuhoy sa ila sitwasyon kasubong man may nareport nga mga kasapatan nga nasunog.
