Ginpahayag ni Comelec spokesperson James Jimenez nga ang mga kandidato nga una na nagpahayag nga indi magtambong sa debate apang magapakita sa venue sa natalana nga schedule ang sarang pa nga makigbahin sa aktibidad.
Suno kay Jimenez, may tion pa agud magbag-o ang desisyon sanday Presidential aspirant Ferdinand Marcos Jr. kag running mate sini nga si Sara Duterte-Carpio kun luyag nila nga magtambong sa debate sa Marso 19 kag 20.
Suno diri, kun magkadto sila sa venue, indi ang mga ini pagtabugon.
Gindugang man sini nga may isa ka kandidato nga wala lang niya ginpangalanan, nga nagreques nga bisitahon ang venue.
Suno diri, pagahatagan nila sang oportunidad ang mga candidates nga matsekyar ang venue bangud importante ini agud ila mahibaluan kun diin sila mapwesto, ano ang posible nga himuon sa area kag sin-o ang ila sarang nga madala.
Ginpahayag man sini nga kun indi luyag sang isa ka kandidato nga mag-avail sang nasambit nga oportunidad, wala gid sang problema kag kun magtambong ang mga ini sa adlaw sang debate, mas maayo.
Suno kay Jimenez, indi requirement ang written confirmation agud magpartisipar sa debate apang ginpahayag sini nga ang pagpakita sa debate day ang magapatimaan sang agreement sa pagsunod sa mga pagsulundan sang aktibidad.
