Gintindugan ni Senator-Judge Raffy Tulfo nga dapat nag-divest si Vice President Sara Duterte sa iya business interests sang ini ang magpungko bilang Bise Presidente.
Suno kay Tulfo, gin-ako mismo ni VP Sara sa isa ka sworn document nga ginapanag-iyahan nila sang iya asawa nga si Atty. Manases Carpio ang ila nga kompanya.
Pahayag ni Tulfo nga kun wala gindeklarar ni Duterte ang iya pagpanag-iya sang kompanya, mahimo ini nga matawag nga non-declaration.
Apang kun gindeklarar naman niya ini, pahayag ni Tulfo nga mahimo ini nga kwestyonon sa idalom sang Article VII, Section 13 sang 1987 Constitution, nga nagadumili sa Bise Presidente nga makigbahin sa anuman nga negosyo samtang yara sa pwesto.
Bangod sini, ginpahayag ni Tulfo nga makaduluda kun ngaa wala sang may nakapahanumdom kay Duterte nga kinahanglan niya nga magdivest sa iya business interest.
Samtang ginpamangkot naman ni Senator-Judge Risa Hontiveros si SEC Laywer Atty Gerardo Del Rosario kun may nasumiter nga dokumento sa Securities and Exchange Commission (SEC) nga nagapamatuod nga nag-divest si Vice President Sara Duterte sa mga kompanya nga nauna nga gintalakay.
Suno kay Del Rosario, may pila ka kompanya kun sa diin wala naggwa ang pangalan ni VP Sara bilang stockholder ukon director sa mga kasunod nga ginpresentar nga General Information Sheets (GIS).
Apang, ginklaro sang testigo nga wala siya sang gina-uyatan nga dokumento nga makasiling nga ginsaylo ni VP Sara ang ownership sa iban nga tawo.
Suno diri, ang basihan lamang amo ang mga GIS kun sa diin wala na nakalista ang pangalan sang Bise Presidente.
Sa iban pa nga mga kompanya nga gintalakay, ginpahayag man ni Del Rosario nga wala siya sang nakita nga indikasyon sa mga kasunod nga GIS nga nagdivest si VP Sara.
