Ginakwestyon sang Metro Bacolod Chamber of Commerce and Industry (MBCCI) kun ngaa kaangay nga wala sang ginhimo nga tikang ang Department of Energy (DOE), National Grid Corporation of the Philippines (NGCP), kag Energy Regulatory Commission (ERC) agud malikawan ang pagluntad sang yellow kag red alert.
Pahanumdom ni MBCCI Chief Executive Office Frank Carbon, natabo na sang 2021 ang kaangay nga issue, kun sa diin madamo man sang force outages sa mga power plants.
Gani para sa mga negosyante, dapat napreparahan na sang mga ahensya nga involved kun paano ini malikawan.
Suno kay Carbon, yara na sa halos 1,000 megawatts ang nadula nga power load sa Visayas Grid bangod sa mga power plants nga nagadisconnect sa NGCP.
Ini bangod madamo sa mga planta ang may guba, samtang madamo man sang tuman na ka daan.
Pahanumdom sini nga sa pagdugay sang planta, ang ila nga masupply nga kuryente ang naganubo man.
Suno diri, dapat may ara na sang dugang nga mga power plants nga gintukod.
Pahayag sini nga ang Visayas ang ginakabig nga fast growing economy, kag automatic na nga kun nagasanyog ang ekonomiya, nagadako man ang konsumo sa kuryente.
Gani dapat na antisipar na sang DOE, NGCP, kag ERC ang pagsaka sang demand, kag nagdugang na sang mga source sang power supply.
Sa pihak nga bahin, may linibo nga megawatts nga excess power supply naman sa Luzon.
Ginakwestyon sang mga ini kun nagakuha sang power supply ang Visayas Grid sa Luzon, kag kun ano ang rasun kun ngaa indi makakuha sang supply.
