Aminado ang Presidente sang Alliance of Concerned Consumers in Electricity and Social Services (ACCESS) nga kwestyon pa kun sa diin nagakadto ang ginasukot nga ancillary services sa mga electric billings, bangod wala man sang reserved power ang National Grid Corporation of the Philippines (NGCP).
Sa interview sang Bombo Radyo Bacolod kay ACCESS President Wennie Sancho, dapat nga tuman ang pag-antos sang mga pumuluyo sa ginapatigayon nga manual load dropping.
Suno diri, kun indi makabayad madasig man maghatag sang penalidad ukon gina-utdan sang kuryente ang mga power consumer.
Panindugan sini nga indi pwede nga indi magbayad sang husto nga bill ang mga pumuluyo, gani dapat mahatagan man sang husto nga serbisyo.
Pahanumdom niya nga ang collection sang NGCP sa ancillary services kada tuig, ang nagadangat sa P40 billion.
Ini ang dapat ginagamit sa pagbakal sang reserve power, nga kuntani nagserbe nga stop-gap measures sa pagkadula sang pila ka power plants sa Grid.
Gani kwestyon sang ACCESS kun diin nagkadto ang ginabayad sang pumuluyo para sa ancillary services, kun ini ang wala man nagtupa sa pagbakal sang power reserves.
Dugang pa ni Sancho nga dapat na nga ma-upgrade ang NGCP bangod ang structure sini ang nahuman para sa coal kag fossil fuel, gani indi makasulod ang mga renewable energy.
Samtang tuman naman ka daan ang submarine cable nga nagakonekta sa Negros Island kag Iloilo, gani ini ang madasig nga mag-init.
Panawagan ni Sancho nga ipaiway na anay ang pamulitika kag unahon ang paghatag solusyon sa power crisis.
