Ginpahayag sang national president sang transport group nga PISTON nga indi gid solusyon sa padayun nga pagmahal sang produktong petrolyo ang paghatag sang fuel subsidy sa tanan nga drivers kag operators sang mga public transportation.
Suno kay Modesto Floranda, ginakondenar sang grupo ang padayun nga pagsaka sa presyo sang gatong nga nag-umpisa humalin pa sang Enero.
Paathag sini nga ang pagsaka sa presyo sang oil products ang indi lang nakaapekto sa mga driver kag operators kundi subong man sa tanan nga pumuluyo ilabi na nga kadungan sini nagamahal man ang presyo sang mga prime commodities.
Sa pihak nga bahin, wala naman sang pagsaka sa sweldo sang mga pumuluyo.
Santo sa nangin hinun-anon sang Marso 15, ginapahayag nga paggwaon na ang P1.2 billion nga budget nga ginpartinisir para sa tanan nga public transportation.
Paathag ni Floranda nga indi lang jeepney drivers kag operators ang makabenipisyo sa subsidy kundi amo man ang mga nagabyahe nga tricycle, PUV, bus kag iban pa.
Apang aminado naman ini nga isa sa dako nga problema diri amo ang kadamuon sang proseso antes maclaim ang ayuda.
Suno kay Floranda, ang subsidy ang indi pagid makabig nga solusyon sa pagsaka sang presyo sang gatong bangod sa kada adlaw nga pagbyahe sang mga driver, nagadangat sa P363 ang nagakadula sa ila kita nga madala pa kuntani sang mga ini sa ila pamilya.
Ang derekta nga nagakadula sa mga driver sa bilog nga bulan ang nagdangat naman sa P8,400.
Panawagan ni Floranda sa sector sang public transportation kag mga pumuluyo nga mag-upod sa panawagan nga amyendahan ang mga layi kaangay sa Oil Deregulation Law, Train Law kasubong man sa pagpatuman sang E-Vat kag Excise Tax sa oil products.
