Pilason ang duha ka collector sang pautang nga nagaangkasanay sa motorsiklo matapos nga nabungguan sang Ceres bus sa Hacienda Gustina, Barangay Robles, banwa sang La Castellana alas-9:45 kaina sang aga.
Suno kay Police Capt. Dennis Melgarejo, deputy chief sang La Castellana Municipal Police Station, ang motorsiklo ang ginamaneho ni Leah Ybañez, 45-anyos samtang nagaangkas naman diri ang Indian national nga si Lackmvir Kaur.
Ang Ceres bus naman ang ginamaneho ni Jonathan Bayhon kag residente sang Purok Chico, Barangay Handumanan, Bacolod City.
Nagikan sa La Carlota City kag padulong sa La Castellana ang bus kag motorsiklo apang bangud under construction ang dalan sa lugar, nagpreno si Ybañez kag wala ini nadiparahan sang driver sang bus gani iya nga gin-arado.
Nalapakan pa sang goma sang bus ang till ni Ybañez gani siya ang nag-agom sang patal nga pilas.
Sila ang gindala sa Rural Health Unit sang La Castellana apang ginrefer sa ospital diri sa Bacolod para sa dugang nga medical treatment.
Ang driver naman sang bus nga si Bayhon ang yara sa kustodiya sang La Castellana Municipal Police Station.
