Pilason ang Indian national kag kaupod nga collector matapos gintiro sang duha ka mga suspetsado sa Pusod Victan, Barangay 20, syudad sang Victorias, Disyembre 20 sang aga.
Sa interview sang Bombo Radyo kay Police Major Joy Ellaga, deputy chief of Police sang Victorias City, sakay ang duha ka mga biktima sa motorsiklo, ang driver amo ang collector nga Filipino national samtang nagaangkas ang Indian national.
Suno kay Ellaga, samtang nagabiyahe, may nasundan ang duha nga trucking nga nagbahar kun sa diin nagbahar man ang nagadrive sang motorsiklo nga ginasakyan sang Indian national, sang hinali lang nag-ulhot ang mga suspek kag gilayon nga gintiro ang duha.
Narecover sa lugar sang insidente ang anom ka basiyo sang kalibre 45 nga armas luthang.
Stable na ang kondisyon sang duha matapos nga maoperahan kahapon apang nagapabilin sa hospital.
Ginalantaw sang mga kapulisan nga may kaangtanan sa negosyo sang biktima ang motibo sa pagtiro diri bangud indi man robbery hold-up bangud wala man sang valuable items nga nadula sa pagkabutang sang biktima.
Nagahulat nalang ang Victorias City Police Station nga makuhaan sang statement ang mga biktima bangud may yara naman sila sang persons of interest sa natabo nga shooting incident.
