Gin-athag sang hepe sang San Enrique Municipal Police Station nga ginrelease nila ang Indian National nga may Filipino Citizen nga drivers license apisar nga nakabunggo sa 15 anyos nga solterito sa Barangay Batuan, San Enrique, bangud may initial settlement na nga natabo.
Sa interview sang Bombo Radyo Bacolod kay Police Major Leo Estopa, nakabaton sila sang report nga may yara sang aksidente sa Barangay Batuan kun sa diin ginrespondehan man ini sang traffic investigator.
Suno kay Estopa, ang menor de edad nga biktima ang gindala gilayon sa hospital kag gincontact man ang himata sini.
Ginhatagan man sang traffic investigator sang citation ticket ang Indian national nga si Nadet Bukari Singh, residente sang Barangay Estefania, Bacolod City.
Suno diri wala na gindetain ang Indian National bangud may yara sang settlement kun sa diin nagpahayag man ang nakabunggo sa biktima nga buligan niya ini.
Ang menor de edad ang yara sa karun ginsaylo sa ospital sa ciudad sang Bacolod santo man sa pahayag sang traffic investigator sang San Enrique Municipal Police Station.
Suno sa hepe indi macontact ang guardian sang bata gani nakig-angot nalang sila sa barangay kun sa diin ini nagapuyo.
Suno diri, may yara na sang settlement sa tunga sang Indian National kag sang Barangay Kagawad kag mga witnesses kun sa diin nakasugtan nga buligan sang nakabunggo ang medical expenses sang biktima.
Apang sa pagdangop sang pamilya sa Bombo Radyo Bacolod kaina sang aga, ang solterito ang yara lamang sa ila balay bangod indi pa batunon sa Corazon Locsin Montelibano Memorial Regional Hospital tubtob nga wala sang CT Scan.
Wala man ang mga ini sang ideya sa ginpahayag sang hepe nga initial payment sang Indiano para sa medication.
Makitaay kuntani kahapon ang tiya sang biktima kag si Singh apang wala madayon kag ginreschedule sa masunod nga adlaw.
