Pilason ang isa ka Indian National matapos gintiro sang duha ka wala pa makilal-an nga mga suspek sang Enero 12, 2024 sa Quanque Apartment Charmaine Village Municipal Poblacion 1, Sagay City, Negros Occidental.
Ginkilala ang biktima nga si Mandeep Singh, 44 anyos, isa ka negosyante kag residente sang nasambit nga lugar.
Sa imbestigasyon sang mga kapulisan, ala 8:15 ang takna sa gab-i, nagapauli na ang biktima sa ila nga puluy-an kag sang nagpanaog ini sa ginasakyan nga motorsiklo, ginpalapitan ini sang duha mga wala makilal-an nga suspek kag gintiro.
Naigo sa wala nga tiil ang indian national samtang ang mga suspek gilayon man ang nagpalagyo.
Nakita sa crime scene ang empty shell sang calibre 45.
Sa karun, ginapangita pa sang mga kapulisan ang mga suspetsado.
