Nangibot ang Indiana Pacers matapos makuha ang kadalag-an sa Game 1 sang National Basketball Association (NBA) Finals sa home court sang kasumpong nga Oklahoma City Thunder.
Ang hampang ang nagtapos sa score nga 111-110 pabor sa Pacers.
Humalin sa panugod sang hampang, ang Oklahoma na amo ang nagapanguna kun sa diin nagdangat pa sa 15 ka puntos ang abanse pagdangat sa 4th quarter.
Una naman nga matalupangdan ang madamo nga turn over gikan sa Indiana sa una nga mga quarters tubtob nga naghimo sang adjustments sa mga players.
Ang Indiana ang nagdaog sa pagpanguna ni Tyrese Haliburton, nga nakapasulod sang 14 ka puntos, may 10 ka rebounds kag anom ka assists.
Si Haliburton ang nakaangkon man sang kabudlayan sa una nga quarters sang hampang, bangod sa tuman ka hugot nga depensa sang Oklahoma.
Sa interview sang Bombo Radyo Bacolod kay Sports Analyst Coach Leo Ceralbo, halos indi mapatihan nga nahimo pa nga mabadbad sang Indiana ang abanse sang kontra.
Sa bilog nga hampang, sa nabilin nga tatlo ka segundo na lamang nahimo makalagas sang Indiana paagi kay Haliburton, nga amo man ang nagdala sa ila kadalag-an.
Wala naman nakapuntos maayo ang Oklahoma sa ulihi nga hugnat sang hampang bangod sa nagpag-on nga depensa sang Indiana.
Aminado si Ceralbo nga indi matake for granted ang Indiana, kag kun wala sang madamo nga turn over si Paskal Siakam, mahimo nga mas dako pa ang ila nga abanse.
Balantayan suno diri ang Game 2 kun sa diin ginalauman nga tinguhaan sang Oklahoma nga makabawi.
Ang Game 2 ang patigayunon sa Lunes, oras sa Pilipinas alas-8:00 sang aga.
