Tuman ang kalipay sang indigent nga mga estudyante kag mga ginikanan kadungan sang pagbaton sang educational assistance nga ginahatag sang Department of Social Welfare and Development (DSWD) kaina.
Para sa Bacolod, ang payout ang ginpatigayon sa 3rd Floor sang SM City Bacolod kun sa diin mismo ang mga personnel sang DSWD Region 6 ang nagaverify kun ang indibidwal ang yara sa listahan sang mga benepisyaryo kag indi walk-in kag kun kumpleto ang dala sini nga dokyumento.
Nagbulig man ang mga personnel sang Bacolod Police Station 1 kag Public Order and Safety Office sa pagbantay sa seguridad.
Suno kay Angeline Jamandre sang Barangay 16, Bacolod City, 2nd year college sa UNO-R nga nagakuha sang BSED Major on English, nagparehistro ini online apat na ka adlaw ang nakaligad kag mahapos man lang ang registration.Kagab-i, nabaton sini ang mensahe nagikan sa DSWD nga siya ang magakadto sa payout site agud nga magclaim sang cash aid.
Suno diri, ang P4,000 nga iya nabaton ang ibakal niya sang mga kinahanglanon sa unibersidad bangud wala pa ini nakumpleto.
Bangud dako ang tuition suno sa iya, mabuhin-buhinan ang balayran sang iya iloy kasunod sang ayuda bangud tatlo sila nga nagaeskwela kag napatay ang iya nga amay sang bulan sang Hunyo.
Tuman naman ang kalipay ni Andy Marco Mano sang Barangay Taculong, Bacolod City kadungan sang pagbaton sang P4,000 nga educational assistance.
Suno sa 1st year college student sang VMA Global College, ang kwarta ang ibakal niya sang kinahanglanon sa pag-eskwela bangud wala pa ini nakumpleto.
Nagpasalamat man ini sa gobyerno sa bulig nga nabaton.
Suno naman sa iloy nga si Edna Buerong, P2,000 ang iya nabaton para sa duha niya ka bata nga Grade 9 kag Grade 6.
Suno diri, wala sila sang inugbakal sang notebooks kag sapatos sang iya kabataan gani nag-apply ini agud nga makakuha sang ayuda.
Nagpasalamat naman ini sa DSWD sa bulig nga ginahatag sa mga pigado.
