Maga-upod sa patigayunon nga indignation rally sa Setyembre 21 ang mga kaparian sa Diocese of Bacolod.
Sa interview sang Bombo Radyo Bacolod kay Fr. Julius Espinosa, director sang Caritas Bacolod Social Action Foundation Incorporated, ang indignation rally batok sa kurapsyon ang ginpangunahan sang One Negros Ecumenical Council (ONEC), nga organisasyon sang nanarisari nga simbahan sa Negros Occidental sa pagpanguna ni Bishop Gerardo Alminaza sang Diocese of San Carlos.
Luwas sa religious sector, maga-upod man diri ang youth kag iban pa nga organisasyon kag sektor.
Bangod ginsarado ang pila ka bahin sang Bacolod City Public Plaza para sa beautification, ginalantaw ni Espinosa nga patigayunon ang indignation rally sa bahin sang Negros Occidental Provincial Capitol Lagoon.
Suno diri, target nila nga makatipon sang lima ka libo nga maga-upod sa pagprotesta, apang bangod ang iban nga grupo ang may nauna na nga mga commitments, ginalantaw yara sa masobra tres mil ang maga-upod, apang mahimo pa nga madugangan.
Suno kay Espinosa, ini ang pamaagi nila agud mapagwa ang kaakig sa kakulangan sang accountability sa nagakatabo nga kurapsyon kag ipanawagan ang transparency gikan sa gobyerno.
