May nabutang na nga informative signages ang Department of Public Works and Highways (DPWH) sa Bacolod-Negros Occidental Economic Highway (BANOCEH) agud mahatagan sang pahibalo ang mga drivers nga magalabay sa highway samtang napadayon pa ang construction.
Sa interview sang Bombo Radyo kay Engr Sonny Boy Oropel, Regional Director sang DPWH- Region 6, posible pa nga madugangan ang mga signages nga ila ginbutang kaangay sang ‘slow down’ kun may yara sang pedestrian lane kag may yara man sang yellow box ukon ang yellow nga pinta nga box sa alagyan nga may ‘X’ sa tunga sang intersection nga nagapahibalo nga dapat mag-untat anay ang drayber antes nga magtabok.
Suno pa diri, may yara na sang nakakas nga isa ka solar light apang ang solar light nga yara sa tunga sang intersection ang padayon pa nga gina-evaluate kun obstruction gid man sa dalan.
