Ginakalipay sang Department of Education (DepEd) Division of Negros Occidental ang inisyatibo sang banwa sang Toboso nga “module baylo bugas”.
Nahibaluan nga nagapatigayon sang amo nga programa ang banwa sang Toboso kun sa diin nagahatag ang LGU sang tag-isa ka kilo sang bugas sa kada estudyante nga nakapasa kag nakakumpleto sang ila nga module kada semana.
Sa interview sang Bombo Radyo Bacolod kay Ian Arnold Arnaez, public information officer sang DepEd Division of Negros Occidental, ginpahayag sini nga ila gid ginakalipay ang tikang sang LGU sang Toboso bangud paagi sini makita gid ang “partnership in action” pag-abot sa edukasyon.
Suno kay Arnaez, isa sa pinakamabaskog nga partner sang DepEd natuhoy sa edukasyon amo ang mga LGU.
Dugang pa sini nga makita man paagi sa amo nga programa nga prayoridad sang LGU ang edukasyon sang mga kabataan.
Suno sa iya, maayo gid ini nga inisyatibo ni Mayor Richard Jaojoco bangud mas ma-motivate pa gid ang mga kabataan nga himuon kag tapuson ang ila mga module.
