Patay ang 63 anyos nga inkargado matapos ginluthang sa Hacienda San Isidro, Brgy Bagtic, Silay City kapin alas-7:20 kaina sang aga.
Ang biktima ang ginkilala nga si Ricardo Grullo, kasado, residente sang Hacienda Bias 1, Brgy Guimbalaon, Silay City.
Sa interview sang Bombo Radyo Bacolod kay Police Major Sarah Villanueva, deputy chief of Police sang Silay City Police Station, ang suspect ang nagdul-ong sa iya manunudlo nga bata sa masakyan sini padulong sa eskwelahan kapin alas-6:30 tubtob alas-6:40 sang aga.
Apang sang siya ang papauli na, didto ini gintambangan kag ginluthang.
Ang motor sang biktima ang kaangay nga nagliko pa sa isa ka gamay nga dalan antes matumba, nga suno kay Villanueva, mahimo nga agud makapangayo sang bulig.
Narecover ang walo ka basiyo sang bala sa lugar kag kaangay nga gin-ubos gid ang isa ka magazine sang cal. 45 pistol.
Ang biktima ang nag-agom sang tatlo ka igo sang bala sa lawas nga ginalakipan sang duha sa tiyan kag isa sa abaga, kasubong man ang isa sa ulo nga naglapos sa iya helmet.
Sa karun wala pa sang matumod nga suspect apang sa pagbanta sini mahimo nga duha ang suspetsado.
Padayun ang imbestigasyon sang Silay City Police Station agud matumod ang mga suspect sa krimen.
Samtang nagahilibion naman ang bata sini nga nagapanawagan sa mga suspect.
Suno sa manunudlo, nahanungod sa luyag nga baklon nga salakyan ang ulihi nila nga diskusyon sang amay.
Siya ang gindul-ong sa bangga kun sa diin ini makasakay sa ila nga service padulong sa eskwelahan.
May programa pa kuntani sa eskwelahan kag siya ang natalana nga maghatag sang opening prayer sang siya ang ginpahibalo natuhoy sa natabo sa iya amay.
Nagapanic naman ini bangod may kabudlayan ang pagkadto sa area, kag siya ang ginpadul-ong na lamang sa lugar agud matsekyar ang sitwasyon.
Suno sa bata, wala man ini sang namutikan nga nagasunod sa ila sang siya ang gindul-ong.
Wala gid ini sang ideya sa mahimo rasun sang pagpatay, apang nagahilibion ini nga nagasaysay nga kuntani nagpaminsar anay ang suspect kag nagpakita sang kaluoy./ Suno sa bata, mabuot ang iya amay, wala sang kontra kag matarong nga naga-obra sang iya trabaho.
