Gilayon nga nagpatigayon sang imbestigasyon ang warden sang Negros Occidental District Jail sang nakabaton sang impormasyon nga ginatransaksyunan sang iligal nga droga ang NODJ.
Sa interview sang Bombo Radyo kay Jail Senior Inspector Norberto Miciano, nagpatigayon siya sang imbestigasyon sang ini ang nakabaton sang impormasyon nga ginatransaksyunan sang iligal nga droga ang prisuhan sang pila ka mga PDL ukon person deprived of liberty.
Ginpaidalom naman sa drugtest ang ginatumod nga inmate kag nagpatigayon sang greyhound operation apang wala sila sang may naconfiscate nga kontrabando.
Suno kay Miciano, negative naman sa drugtest ang PDL.
Nagahulat naman sila sang resulta sang separado nga imbestigasyon halin sa BJMP regional office.
Suno sa warden, indi pa makumpirmar kun miyembro sang Divinagracia drug group ang suspetsado bangod ginahulat pa ang resulta.
Nagpangako naman si Miciano nga himuon nila ang tanan agod makacontribute sa away kontra droga.
Ginpanindugan niya man nga wala sang miyembro sang NODJ ang involved sa iligal nga buluhaton kag kun may yara man, indi siya magtolerar diri kundi pasabton sa paglapas sang layi.
